Ձեր հեռախոսահամարը չի հրապարակվելու: Պահանջվող դաշտերը նշված են *
Նոյեմբերի 25-ին Տավուշի մարզի Սևքար համայնքում տեղի ունեցավ միջնակարգ դպրոցին հարակից մրգատու այգու բացումը, որը հիմնվել էր ԱՐՄՍՎԻՍԲԱՆԿ-ի հովանավորությամբ և Տավուշի մարզպետարանի աջակցությամբ, Բանկի, մարզպետարանի, Սևքարի համայնքապետարանի աշխատակիցների, դպրոցի աշակերտների, ինչպես նաև համայնքի բնակիչների կողմից: Բացման արարողությանը ներկա էին Տավուշի մարզպետ Հայկ Չոբանյանը և ԱՐՄՍՎԻՍԲԱՆԿ-ի գործադիր տնօրեն Գևորգ Մաչանյանը, ովքեր նույնպես այգում տնկեցին ծառեր և իրականացրին տեղադրված հուշատախտակի բացում:
«Շնորհակալ ենք Արմսվիսբանկին այս գեղեցիկ նախաձեռնության համար: Սա մի յուրահատուկ երթի սկիզբ է, և մենք պետք է այնպես անենք, որ հաջորդ տարվա վերջին մարզային բոլոր դպրոցներն ունենան նմանատիպ այգիներ, քանի որ դպրոցն ամենահամայնքային կառույցն է և թելերով կապված է համայնքի բոլոր ընտանիքների հետ: Իսկ այգի հիմնելն ու խնամելը հոգատարություն է և մշակույթ, ինչը պիտի սերմանվի դպրոցական տարիքից:»,- հայտնեց Տավուշի մարզպետ Հայկ Չոբանյանը:
«Շնորհավորում եմ բոլորիս այսօրվա կապակցությամբ: Իրական շնորհակալությունը Բանկին և այգու հիմնման համար ջանքեր գործադրած մարդկանց կլինի այն, որ որոշ ժամանակ անց այցելելով այստեղ կտեսնենք խնամված, բարեկարգ և իր նպատակին ծառայող այգի: Գնահատելով մյուս դպրոցների հարակից տարածքներում նոր այգիներ հիմնելու Ձեր վճռականությունը` մենք անմասն չենք մնա մարզպետարանի հետագա նմանատիպ նախաձեռնություններից, և նույնպես ներգրավված կլինենք հաջորդ տարում առնվազն մեկ դպրոցին հարակից այգու հիմնման աշխատանքներին:»,- հայտնեց ԱՐՄՍՎԻՍԲԱՆԿ-ի գործադիր տնօրեն Գևորգ Մաչանյանը:
Շնորհակալական խոսք ասեց նաև դպրոցի տնօրեն Նաիրա Թանանյանը. «Հուսով եմ, որ այս այգու շնորհիվ երեխաների մոտ կմեծանա սերը դեպի հողը և գյուղատնտեսական աշխատանքը: Բացի այդ, շնորհակալ ենք Արմսվիսբանկին դպրոցին արևային ջրատաքացուցիչ նվիրաբերելու համար, ինչն այսուհետ մեր երեխաներին կապահովի անվճար տաք ջուր»:
Այգու բացումից հետո Ապագա Ռեզորթում անցկացվեց Բիզնես Ֆորում, որին մասնակցեցին Տավուշի մարզպետը, Բանկի տնօրենը, ներկայացուցիչներ մարզից և Բանկից, մարզի բիզնեսների ներկայացուցիչներ, ներդրողներ:
Ֆորումի ընթացքում Բանկի ներկայացուցիչները ներկաներին ծանոթացրեցին Բանկի անցած ուղու, առաջարկվող պրոդուկտների, աշխատանքային գործընթացների հետ, տեղի ունեցան քննարկումներ, ծանոթություններ:
Այս միջոցառումը կարելի է համարել մասնավոր և պետական հատվածների համագործակցության լավագույն փորձ:
Բոլոր իրադարձությունները
