ԱՐՄՍՎԻՍԲԱՆԿ-Ի ԿՈՂՄԻՑ ՏԱՎՈՒՇԻ ՍԵՒՔԱՐ ՀԱՄԱՅՆՔԻ ՄԻՋՆԱԿԱՐԳ ԴՊՐՈՑԻՆ ՀԱՐՈՂ ՏԱՐԱԾՔՈՒՄ ԱՅԳՈՒ ՀԻՄՆՄԱՆ ԱՇԽԱՏԱՆՔՆԵՐ ԵՆ ԻՐԱԿԱՆԱՑՎԵԼ
ԱՐՄՍՎԻՍԲԱՆԿ-ի հովանավորությամբ և Տավուշի մարզպետարանի աջակցությամբ 16.11.2019թ-ին Բանկի աշխատակիցներն իրականացրել են Տավուշի Սևքար համայնքի միջնակարգ դպրոցին հարող շուրջ 6,500քմ տարածքում մրգատու ծառերի՝ մասնավորապես արքայանարնջի, խնձորի, թզի, ընկույզի շուրջ 550 ծառերի տնկման աշխատանքներ: Մարզպետարանի առաջարկով ընտրվել են տվյալ շրջանի բնակլիմայական պայմաններին համապատասխան մրգատու ծառատեսակներ:
Բացի ծառատունկից, նաև կատարվել են այգու հիմնման նպատակով անհրաժեշտ նյութերի ձեռք բերման և տարածքի պարսպապատման, մաքրման, բարեկարգման, ինչպես նաև ոռոգման համակարգի կառուցման աշխատանքներ, որոնց ամբողջական ֆինանսավորումն իրականացվել է ԱՐՄՍՎԻՍԲԱՆԿ-ի կողմից: Այգու հիմնման աշխատանքներին, բացի Բանկի աշխատակիցներից, ակտիվ մասնակցել են նաև Տավուշի մարզպետարանի, Սևքարի համայնքապետարանի և դպրոցի աշխատակազմները, ինչպես նաև համայնքի բնակիչներն ու աշակերտները:
Ծառատունկը վերածվել էր մեծ տոնական միջոցառման, որտեղ աշակերտները հանդես եկան հայրենասիրական բնույթի երգերով, պարերով և բանաստեղծություններով:
«Այգու հիմնումը եղել է մեր տարիներով սպասված երազանքը, որն ԱՐՄՍՎԻՍԲԱՆԿ-ը և Տավուշի մարզպետարանը մեզ պարգևեցին շատ անակնկալ և բաղձկալի նվերի տեսքով, որի համար շատ շնորհակալություն եմ հայտնում Բանկի գործադիր տնօրեն Գևորգ Մաչանյանին և Տավուշի մարզպետ Հայկ Չոբանյանին, ինչպես նաև Բանկի, համայնքապետարանի և մարզպետարանի ողջ անձնակազմին» հայտնեց Սևքարի միջնակարգ դպրոցի տնօրեն Նաիրա Թանանյանը:
Նշված միջոցառման իրականացումը Բանկի նախաձեռնությունն է եղել, իսկ տեղի ընտրությունը պատահական է և հիմնականում պայմանավորված այս շրջանում ծառատունկի համար բարենպաստ բնակլիմայական պայմաններով: Նախաձեռնությունը պլանավորված է եղել դեռևս 2-3 ամիս՝ պայմանավորված Բանկի հիմնադրման 15 ամյակին ընդառաջ և Բանկի ու Մարզպետարանի արդյունավետ համագործակցության արդյունքում որպես մրգատու այգու հիմնման համար նպաստավոր տարածք ընտրվել է Սևքարի միջնակարգ դպրոցի հարող տարածքը:
Նման միջոցառումների իրականացումը Բանկի կողմից կկրեն շարունակական բնույթ: Հատկանշական է, որ «Կանաչ» տնտեսության ֆինանսավորմումը հանդիսանում է Բանկի ռազմավարական ուղղություններից:
